HOTUBA YA MHE. MBUNGE WA ARUSHA MJINI KWENYE MAKABIDHIANO YA ENEO LA UJENZI HOSPITALI YA MAMA NA MTOTO ARUSHA

Mbuge wa Arusha Mjini Mhe Godbless J.Lema

Mwaka 2010 wakati naomba kuchaguliwa kuwa Mbunge  moja ya ahadi zangu kubwa kwa Wananchi  ilikuwa ni kujenga Hospitali ya Mama na Mtoto .Ndoto hii ilitokana  na ukweli kwamba bado matibabu yanayohusu Mama na Mtoto  katika Bara lote la Afrika ni yakusikitisha sana . 

Tanzania ni miongoni mwa Nchi ambazo matatizo ya Afya kwa ujumla yana mgogoro mkubwa hususani katika afya ya Mama na Mtoto. Taarifa za Vifo za kina Mama mpaka mwishoni mwa mwaka 2010 zilikuwa ni vifo Elfu Saba na Mia Tano, sawa na wastani wa vifo Mia Sita Ishirini na Tano kwa mwezi, sawa na vifo Ishirini na Moja kwa siku, (kwa mujibu wa taarifa za Wizara ya afya TZ) , hali hii ilitufanya  Mimi na Rafiki zangu kufikiria namna ya  kumsaidia Mama  anayejifungua na Mtoto anayezaliwa  . 

Pamoja na mambo mengine ambayo taasisi hii inayafanya na inaendelea kuyafanya  tuliweka lengo mathubuti  kwa ajili ya afya ya Mama na Mtoto . Tulianza juhudi za kutafuta na eneo kwa ajili ya ujenzi wa Hospital ya Mama na Mtoto , kazi hii haikuwa rahisi hata kidogo , katika kuendelea kuangaika kwa ajili ya jambo hili muhimu tulikutana na Kaka yetu na Rafiki yetu Mpendwa  sana Hayati  Wakili Nyaga Mawalla . 

Nyaga alikuwa Mtu mzuri , mwenye mawazo chanya, Mzalendo , na mwenye Upendo na rafiki zake na maendeleo . Tulimweleza mawazo yetu juu ya afya ya Mama na Mtoto na changamoto tuliyokuwa nayo ya jinsi ya kutekeleza Ndoto hii nzuri . 

Tunaikumbuka siku ile , kwani mwisho wa kikao chetu Hayati  Wakili Nyaga Mawalla alitoa eneo la kujenga Hospitali ya Mama na Mtoto na ahadi ya kugharamia michoro ya ujenzi wa Hospitali hiyo pindi tutakapokuwa tayari kuanza ujenzi.

Leo tuko hapa na yeye hayupo  tulitamani angekuwepo hapa leo  aone jinsi nia yake njema inavyotekelezwa  kwa faida kubwa ambayo   ni Utu ,Upendo ,na Huruma  . Our Brother  Nyaga  your presence is  not here with us today  but your good heart will never be forgotten to us and  to our society.

Hata hivyo ,tumekutana na changamoto nyingi katika safari hii , uongo mwingi , kashfa nyingi na dhihaka zenye lengo la kutuvunja moyo , wapo waliosema eneo  hili limeuzwa na leo tunasema Hospitali inaanza kujengwa . 

Taarifa ya WHO ya mwisho wa mwaka huu (2015) inaonyesha katika kila Wanawake Laki Moja wanaojifungua Wanawake 410 hufariki kwa kukosa huduma nzuri  wakati wa kujifungua hapa Tanzania , kwetu sisi hii ni changamoto na  kushindwa ni falsafa iliyopeteza  maana , Maisha ya Mama na Mtoto yana muhitaji kila mmoja wetu.

Nawashukuru sana Maternity Africa na marafiki zenu , Nia yenu njema kwa Binadamu  Duniani imedhihirika leo  kwa Mama na Mtoto wa Arusha .  Mama Teresa aliwahi kusema “The greatest science in the world, in heaven and on earth is LOVE”

Moyo wangu umejaa furaha sana leo  nawashukuru sana Wakurugenzi  wote wa ArDF, Mawalla Trust Ltd  na Watu wote ambao mmekuwa msaada katika jambo hili hadhimu .  

Mungu awabariki sana .

Godbless  J Lema ( MB)